rafta-ba-rafta khul gae jitne kamal the

rafta-ba-rafta khul ga.e jitne kamāl the

us ke kahe hue sabhī jumle kamāl the

us umr kā nasha thā sharāboñ se bhī sivā

dekhe the un dinoñ jo vo sapne kamāl the

karte the kis qadar vo buzurgoñ kā ehtirām

kitne hamāre daur ke bachche kamāl the

go husn maañd kar rahe the shahr kā magar

dīvār par bane hue naqshe kamāl the

izzat se pesh aate the har ajnabī ke saath

is shahr ke makīn bhī kitne kamāl the

ushshāq-e-hijr-zād ne mahbūb ke liye

likkhe fasīl-e-shahr pe jumle kamāl the

har shaḳhs ho chukā thā asiir us ke husn kā

is husn-e-be-misāl ke jalve kamāl the

ik dūsre ko mārnā phir rūThnā bahut

vo bachpane ke jhagḌe bhī kitne kamāl the

merā to koī sher kisī kaam kā nahīñ

us ne the jo sunā.e vo naġhme kamāl the

rafta-ba-rafta khul gae jitne kamal the

us ke kahe hue sabhi jumle kamal the

us umr ka nasha tha sharabon se bhi siwa

dekhe the un dinon jo wo sapne kamal the

karte the kis qadar wo buzurgon ka ehtiram

kitne hamare daur ke bachche kamal the

go husn mand kar rahe the shahr ka magar

diwar par bane hue naqshe kamal the

izzat se pesh aate the har ajnabi ke sath

is shahr ke makin bhi kitne kamal the

ushshaq-e-hijr-zad ne mahbub ke liye

likkhe fasil-e-shahr pe jumle kamal the

har shaKHs ho chuka tha asir us ke husn ka

is husn-e-be-misal ke jalwe kamal the

ek dusre ko marna phir ruThna bahut

wo bachpane ke jhagDe bhi kitne kamal the

mera to koi sher kisi kaam ka nahin

us ne the jo sunae wo naghme kamal the