رفتہ رفتہ عشق کو خود آگہی ہونے لگی

رفتہ رفتہ عشق کو خود آگہی ہونے لگی

دور کچھ برہم مزاجی حسن کی ہونے لگی

اللہ اللہ گریۂ شبنم پہ بھی ہیں خندہ زن

بار خاطر مجھ کو پھولوں کی ہنسی ہونے لگی

در حقیقت یہ مرے ذوق نظر کا فیض ہے

حسن کی دنیا میں پیدا دل کشی ہونے لگی

شیخ جب عشق بتاں میں ہو گئے نا کامیاب

امتحاناً پھر خدا کی بندگی ہونے لگی

ان کے کوچے میں بھی جانا مجھ کو آساں ہو گیا

پردہ پوش آرزو دیوانگی ہونے لگی

جور سے کچھ کم نہیں ان کی کرم فرمائیاں

برسر بازار ہم سے دل لگی ہونے لگی

آشیاں کی خیر ہو یا رب یہ کیا اندھیر ہے

شب کو گلشن کی طرف کیوں روشنی ہونے لگی

فیض ساحرؔ جانئے اس کو جناب جوشؔ کا

اب ہماری شاعری بھی ساحری ہونے لگی