raftar ne bismil kiya guftar ne mara

raftār ne bismil kiyā guftār ne maarā

maarā mujhe ik shoḳh-e-sitam-kār ne maarā

uf kar ke jigar thaam liyā zauq-e-nazar ne

vo tiir sā dil par nigah-e-yār ne maarā

ik shakl se iqrār thā ik shakl se inkār

kāfir ke is iqrār-dar-iqrār ne maarā

ye nargis-e-ḳhvābīda hai qātil mere haq meñ

is so.e hue fitna-e-bedār ne maarā

āġhosh-e-fanā se mujhe begāna hī rakkhā

mohtāj-e-ajal kar ke ġham-e-yār ne maarā

ik ḳhanjar-e-poshīda-o-paidā the ye donoñ

iqrār ne maarā kabhī inkār ne maarā

vo pūchhte haiñ mujh se ki maarā tujhe kis ne

ab un se kahe kaun ki sarkār ne maarā

ai nang-e-ġham-e-‘ishq tujhe sharm nahīñ hai

kis muñh se tū kahtā hai ġham-e-yār ne maarā

taufīq-e-mohabbat kā ye anjām bhī dekhā

dil ne mujhe aur dil ko tire pyaar ne maarā

hamdardī-e-hamdam bhī gavāra nahīñ hotī

mujh ko to 'junūñ' is dil-e-ḳhuddār ne maarā

raftar ne bismil kiya guftar ne mara

mara mujhe ek shoKH-e-sitam-kar ne mara

uf kar ke jigar tham liya zauq-e-nazar ne

wo tir sa dil par nigah-e-yar ne mara

ek shakl se iqrar tha ek shakl se inkar

kafir ke is iqrar-dar-iqrar ne mara

ye nargis-e-KHwabida hai qatil mere haq mein

is soe hue fitna-e-bedar ne mara

aaghosh-e-fana se mujhe begana hi rakkha

mohtaj-e-ajal kar ke gham-e-yar ne mara

ek KHanjar-e-poshida-o-paida the ye donon

iqrar ne mara kabhi inkar ne mara

wo puchhte hain mujh se ki mara tujhe kis ne

ab un se kahe kaun ki sarkar ne mara

ai nang-e-gham-e-‘ishq tujhe sharm nahin hai

kis munh se tu kahta hai gham-e-yar ne mara

taufiq-e-mohabbat ka ye anjam bhi dekha

dil ne mujhe aur dil ko tere pyar ne mara

hamdardi-e-hamdam bhi gawara nahin hoti

mujh ko to 'junun' is dil-e-KHuddar ne mara