rag-o-pai mein bhara hai mere shor uski mohabbat ka

rag-o-pai meñ bharā hai mere shor us kī mohabbat kā

namak-parvar vo huuñ maiñ yaar ke husn-o-malāhat kā

banāne se mire bigḌā ye rañg un kī tabī.at kā

mujhī se hai parī-zādoñ ko da.ave ādamiyat kā

ḳharīdārī-e-jins-e-husn par raġhbat dilātā hai

banā hai shauq-e-dil dallāl bāzār-e-mohabbat kā

sadā-e-āh hai mizrāb-e-ġham kī chheḌ se paidā

dil-e-nālāñ nayā parda hai qānūn-e-mohabbat kā

jo vaqt-e-qatl us ke la.al-e-shīrīñ kā paḌā partav

pilāyā āb-e-teġh-e-yār ne sharbat shahādat kā

huā ye dil na jab merā to phir kyā aur kā hogā

bharosa kījiyo tum bhī na aise be-muravvat kā

zamāne ko to mere vāste in sab ne chhoḌā hai

na huuñ kis tarah maiñ mamnūn dard-o-ranj-o-mehnat kā

abas āsūdgān-e-ḳhāk ko bad-ḳhvāb karte ho

abhī se kyuuñ machā rakkhā hai hañgāma qayāmat kā

za.īfī meñ bashar lahv-o-la.ab ko tark karte haiñ

safedī mū-e-sar kī nuur hai kyā chashm-e-ibrat kā

bahār-e-bāġh-e-ālam be-sabāt aisī hai ai bulbul

gumāñ hai ḳhanda-e-gul par sadā-e-kūs-e-rehlat kā

dabistān-e-azal meñ ūstād-e-ishq ne mujh ko

sabaq pahle diyā thā abjad-e-vāb-e-mohabbat kā

sadā yaañ hillat-e-bint-e-anab kī aqd jaarī hai

tarīqa hai nirālā pīr-e-mai-kash kī tarīqat kā

jo paayā muġhbachoñ meñ tarz-e-e.ajāz-e-masīhā.ī

huā zāhid bhī qaa.il pīr-e-mai-kash kī karāmat kā

subūt-e-jurm ulfat kar ke maarā us ke saude ne

tirī zulf-e-rasā darrah banī shar.a-e-mohabbat kā

na dekhā muḌ ke bhī phir ahd-e-pīrī meñ javānī ne

abas mazkūr karte ho tum aise be-muravvat kā

vo bekas huuñ sivā.e shabnam-e-giryāñ pas-e-murdan

diyā rone meñ kis ne saath merī sham-e-turbat kā

ġhubār-e-kīna-o-buġhz-o-hasad se paak hai ye dil

hamāre aa.ine ne muñh nahīñ dekhā kudūrat kā

kareñ kyā riñd mashrab iḳhtiyār ik maz.hab ai vaa.iz

nahīñ dil toḌnā manzūr haftād-o-do-millat kā

'qalaq' har vaqt ab hai sāmnā taklīf-e-pīrī kā

javānī luuT kar sab le ga.ī asbāb rāhat kā

rag-o-pai mein bhara hai mere shor us ki mohabbat ka

namak-parwar wo hun main yar ke husn-o-malahat ka

banane se mere bigDa ye rang un ki tabiat ka

mujhi se hai pari-zadon ko dawe aadamiyat ka

KHaridari-e-jins-e-husn par raghbat dilata hai

bana hai shauq-e-dil dallal bazar-e-mohabbat ka

sada-e-ah hai mizrab-e-gham ki chheD se paida

dil-e-nalan naya parda hai qanun-e-mohabbat ka

jo waqt-e-qatl us ke lal-e-shirin ka paDa partaw

pilaya aab-e-tegh-e-yar ne sharbat shahadat ka

hua ye dil na jab mera to phir kya aur ka hoga

bharosa kijiyo tum bhi na aise be-murawwat ka

zamane ko to mere waste in sab ne chhoDa hai

na hun kis tarah main mamnun dard-o-ranj-o-mehnat ka

abas aasudgan-e-KHak ko bad-KHwab karte ho

abhi se kyun macha rakkha hai hangama qayamat ka

zaifi mein bashar lahw-o-lab ko tark karte hain

safedi mu-e-sar ki nur hai kya chashm-e-ibrat ka

bahaar-e-bagh-e-alam be-sabaat aisi hai ai bulbul

guman hai KHanda-e-gul par sada-e-kus-e-rehlat ka

dabistan-e-azal mein ustad-e-ishq ne mujh ko

sabaq pahle diya tha abjad-e-wab-e-mohabbat ka

sada yan hillat-e-bint-e-anab ki aqd jari hai

tariqa hai nirala pir-e-mai-kash ki tariqat ka

jo paya mughbachon mein tarz-e-eajaz-e-masihai

hua zahid bhi qail pir-e-mai-kash ki karamat ka

subut-e-jurm ulfat kar ke mara us ke saude ne

teri zulf-e-rasa darrah bani shara-e-mohabbat ka

na dekha muD ke bhi phir ahd-e-piri mein jawani ne

abas mazkur karte ho tum aise be-murawwat ka

wo bekas hun siwae shabnam-e-giryan pas-e-murdan

diya rone mein kis ne sath meri sham-e-turbat ka

ghubar-e-kina-o-bughz-o-hasad se pak hai ye dil

hamare aaine ne munh nahin dekha kudurat ka

karen kya rind mashrab iKHtiyar ek mazhab ai waiz

nahin dil toDna manzur haftad-o-do-millat ka

'qalaq' har waqt ab hai samna taklif-e-piri ka

jawani luT kar sab le gai asbab rahat ka