رہ وفا میں بصد شوق جب بھی ہم نکلے

رہ وفا میں بصد شوق جب بھی ہم نکلے

قدم قدم پہ سبھی مائل ستم نکلے

نہیں یہ گیسوئے جاناں یہ زلف گیتی ہے

ہر ایک بیچ میں پنہاں ہزاروں خم نکلے

انا پسندیٔ فطرت کو اب قرار کہاں

بہشت چھوڑ کے مشکل سفر پہ ہم نکلے

ملی نہ منزل جاناں رکھے نہ پائے طلب

قدم قدم پہ مقدر کے پیچ و خم نکلے

جنون شوق میں جن کو سمجھ رہا تھا خدا

پڑا جو وقت تو مٹی کے وہ صنم نکلے

تمام عمر چلے ساتھ پھر بھی ساتھ تھے کب

مجیدؔ خوب تمہارے یہ ہم قدم نکلے