رہ رہ کے ہوتی جاتی ہے دنیا تمام شد

رہ رہ کے ہوتی جاتی ہے دنیا تمام شد

ہوتا نہیں ہے عشق کا قصہ تمام شد

پیاسے تو اپنے ہونٹ بھگو کر چلے گئے

لیکن ہوس سے کب ہوا دریا تمام شد

بکھرا کے موتی عشق کے ہر نقش پا کے ساتھ

اس نے کیا ہے دشت تمنا تمام شد

گرتا ہے ایک پردا اندھیرے کا زیست پر

ہوتا ہے روز ایک تماشہ تمام شد

کچھ بھی نہیں بچے گا جہاں میں سوائے عشق

مجنوں تمام ہو گیا لیلیٰ تمام شد

غنچو کی موج اس کے تبسم پہ ہے عیاں

کر دے گی میری آنکھوں کا صحرا تمام شد

آنکھوں میں لے کے پھرتی ہے ناز و ادا کے رنگ

لہرا کے کھینچ لوں تو ہو صہبا تمام شد

اک زخم جس میں تیر بھی پایا گیا نہ جذب

اس پر ہوا ہے علم مسیحا تمام شد

ڈوبیں گے ایک قلزم خوں ہی میں ہم سبھی

ہوگی ہر ایک ہستی اشیا تمام شد

کہہ کر گیا یہ عاشق بیدار عرش سے

ہم جا رہے ہیں تم کرو چرچا تمام شد

اٹھے گی جب بھی موج قیامت کی تب ندیمؔ

کعبہ تمام ہوگا کلیسا تمام شد