raha kahan hai miyan dil pe iKHtiyar use

rahā kahāñ hai miyāñ dil pe iḳhtiyār use

kisī kī yaad ne rakkhā hai ashk-bār use

vo baat baat pe mujh se laḌā.ī kartī hai

kiyā huā hai kisī ne to be-qarār use

galī meñ chaap kisī kī ho chauñk uThtī hai

ka.ī dinoñ se 'ajab sā hai ḳhalfishār use

vo baḌbaḌātī huī ro ke jaag uThtī hai

satā rahā hai bhalā kaun baar baar use

ḳhumār 'ishq kī rāhoñ kā us kī aañkh meñ hai

dhaḌakte dil se kisī kā hai intizār use

samajh rahī hai mohabbat ko vo fareb 'ahmad'

dilā.ūñ kaise vafāoñ kā e'tibār use

raha kahan hai miyan dil pe iKHtiyar use

kisi ki yaad ne rakkha hai ashk-bar use

wo baat baat pe mujh se laDai karti hai

kiya hua hai kisi ne to be-qarar use

gali mein chap kisi ki ho chaunk uThti hai

kai dinon se 'ajab sa hai KHalfishaar use

wo baDbaDati hui ro ke jag uThti hai

sata raha hai bhala kaun bar bar use

KHumar 'ishq ki rahon ka us ki aankh mein hai

dhaDakte dil se kisi ka hai intizar use

samajh rahi hai mohabbat ko wo fareb 'ahmad'

dilaun kaise wafaon ka e'tibar use