رہبروں میں سرپھرے ہیں آگہی میں کچھ نہیں

رہبروں میں سرپھرے ہیں آگہی میں کچھ نہیں

راستوں میں حادثے ہیں زندگی میں کچھ نہیں

اے مرے مونس تجھے اپنا کہوں تو کس طرح

قربتوں میں فاصلے ہیں دوستی میں کچھ نہیں

اپنی سوچوں کے بدل دو اب ہر اک انداز کو

حوصلوں میں ولولے ہیں بے حسی میں کچھ نہیں

نیک و بد میں فرق اب کیسے یہاں محسوس ہو

پتھروں میں آئنے ہیں برتری میں کچھ نہیں

تم جو ہو ہم راہ میرے زندگی کی راہ میں

مرحلوں میں قمقمے ہیں تیرگی میں کچھ نہیں

پیار کے رشتہ یہ راحت توڑ مت دینا کبھی

رابطوں میں سلسلے ہیں برہمی میں کچھ نہیں