rahe hum un aankhon ke mastane barson

rahe ham un āñkhoñ ke mastāne barsoñ

pilāyā kiye mai vo paimāne barsoñ

rahī āmad-o-raft barsoñ ḳhudāyā

na hoñge farāmosh but-ḳhāne barsoñ

fidā tujh pe hote haiñ ai sham' fauran

lagāte nahīñ tere parvāne barsoñ

akele meñ hotā hai pal pal qayāmat

ji.e kis tarah ham ḳhudā jaane barsoñ

nahīñ qais kī jāñ-nashīnī kā dā'vā

magar ham ne chhāne haiñ vīrāne barsoñ

khulī dostī āzmā.ish meñ un kī

jin ahbāb ko ham na pahchāne barsoñ

nahīñ reh sake baaz ham ḳhud-kushī se

bahī-ḳhvāh to aa.e samjhāne barsoñ

'sha'ūr' aaj shab jo sunā.e haiñ tum ne

zabāñ-zad raheñge ye afsāne barsoñ

rahe hum un aankhon ke mastane barson

pilaya kiye mai wo paimane barson

rahi aamad-o-raft barson KHudaya

na honge faramosh but-KHane barson

fida tujh pe hote hain ai sham' fauran

lagate nahin tere parwane barson

akele mein hota hai pal pal qayamat

jie kis tarah hum KHuda jaane barson

nahin qais ki jaan-nashini ka da'wa

magar hum ne chhane hain virane barson

khuli dosti aazmaish mein un ki

jin ahbab ko hum na pahchane barson

nahin reh sake baz hum KHud-kushi se

bahi-KHwah to aae samjhane barson

'sha'ur' aaj shab jo sunae hain tum ne

zaban-zad rahenge ye afsane barson