rahe na ghar ke hue KHwar ye to hona tha

rahe na ghar ke hue ḳhvār ye to honā thā

tirī talāsh meñ ai yaar ye to honā thā

qatār jalte charāġhoñ kī bar-sar-e-dīvār

siyāhiyāñ pas-e-dīvār ye to honā thā

zamīn bāñTne vāloñ ke ham muḳhālif the

hamīñ pe aa girī talvār ye to honā thā

guzar ke ik rah-e-pur-ḳhār se yahāñ pahuñche

yahāñ se phir rah-e-pur-ḳhār ye to honā thā

ufuq se pūchh rahe haiñ kahāñ gayā sūraj

hue the der se bedār ye to honā thā

hamīñ ne us ke liye rāste banā.e the

ki ghar tak aa gayā bāzār ye to honā thā

ta.alluqāt kī ta.amīr meñ ḳhulūs thā kam

buland-tar huī dīvār ye to honā thā

rahe na ghar ke hue KHwar ye to hona tha

teri talash mein ai yar ye to hona tha

qatar jalte charaghon ki bar-sar-e-diwar

siyahiyan pas-e-diwar ye to hona tha

zamin banTne walon ke hum muKHalif the

hamin pe aa giri talwar ye to hona tha

guzar ke ek rah-e-pur-KHar se yahan pahunche

yahan se phir rah-e-pur-KHar ye to hona tha

ufuq se puchh rahe hain kahan gaya suraj

hue the der se bedar ye to hona tha

hamin ne us ke liye raste banae the

ki ghar tak aa gaya bazar ye to hona tha

talluqat ki tamir mein KHulus tha kam

buland-tar hui diwar ye to hona tha