rahun asir-e-qafas wo bhi umr bhar ke liye

rahūñ asīr-e-qafas vo bhī 'umr bhar ke liye

ye baat bā'is-e-zillat hai bāl-o-par ke liye

ham us ke saa.e meñ pal bhar sukūn pā na sake

kiyā thā sarf lahū ham ne jis shajar ke liye

mujhe ḳhayāl ye aayā tabassum-e-gul par

ye ehtimām-e-ḳhushī 'umr-e-muḳhtasar ke liye

nahīñ hai ḳhauf añdheroñ kā rāh-e-maqsad meñ

charāġh-e-‘azm hai raushan mere safar ke liye

nigāh-e-shauq kī āvārgī bajā lekin

koī hasīn nazāra to ho nazar ke liye

kahīñ ho jashn-e-charāġhāñ to kyā ġharaz ham ko

bas ik diye kī zarūrat hai apne ghar ke liye

hamārī tīra-nasībī kā ab ye 'ālam hai

ki ik diyā bhī mayassar nahīñ hai ghar ke liye

'ziyā' tum un ko tasallī bhī de nahīñ paa.e

taḌap rahe haiñ jo bīmār chārāgar ke liye

rahun asir-e-qafas wo bhi 'umr bhar ke liye

ye baat ba'is-e-zillat hai baal-o-par ke liye

hum us ke sae mein pal bhar sukun pa na sake

kiya tha sarf lahu hum ne jis shajar ke liye

mujhe KHayal ye aaya tabassum-e-gul par

ye ehtimam-e-KHushi 'umr-e-muKHtasar ke liye

nahin hai KHauf andheron ka rah-e-maqsad mein

charagh-e-‘azm hai raushan mere safar ke liye

nigah-e-shauq ki aawargi baja lekin

koi hasin nazara to ho nazar ke liye

kahin ho jashn-e-charaghan to kya gharaz hum ko

bas ek diye ki zarurat hai apne ghar ke liye

hamari tira-nasibi ka ab ye 'alam hai

ki ek diya bhi mayassar nahin hai ghar ke liye

'ziya' tum un ko tasalli bhi de nahin pae

taDap rahe hain jo bimar chaaragar ke liye