رہوں اسیر قفس وہ بھی عمر بھر کے لیے

رہوں اسیر قفس وہ بھی عمر بھر کے لیے

یہ بات باعث ذلت ہے بال و پر کے لیے

ہم اس کے سائے میں پل بھر سکون پا نہ سکے

کیا تھا صرف لہو ہم نے جس شجر کے لیے

مجھے خیال یہ آیا تبسم گل پر

یہ اہتمام خوشی عمر مختصر کے لیے

نہیں ہے خوف اندھیروں کا راہ مقصد میں

چراغ عزم ہے روشن میرے سفر کے لیے

نگاہ شوق کی آوارگی بجا لیکن

کوئی حسین نظارہ تو ہو نظر کے لیے

کہیں ہو جشن چراغاں تو کیا غرض ہم کو

بس اک دیے کی ضرورت ہے اپنے گھر کے لیے

ہماری تیرہ نصیبی کا اب یہ عالم ہے

کہ اک دیا بھی میسر نہیں ہے گھر کے لیے

ضیاؔ تم ان کو تسلی بھی دے نہیں پائے

تڑپ رہے ہیں جو بیمار چارہ گر کے لیے