rakhi hai husn pe buniyaad-e-ashiqi maine

rakhī hai husn pe buniyād-e-āshiqī maiñ ne

ḳhushī se maut ko de dī hai zindagī maiñ ne

kiyā kabhī na sivā tere ġhair ko sajda

ḳharāb-e-shirk na kī rasm-e-bandagī maiñ ne

ḳhudā.ī mil ga.ī sarkār-e-ishq se mujh ko

ḳhudī ke badle talab kī jo be-ḳhudī maiñ ne

chhalaktā sāġhar-e-mai pī ke chashm-e-sāqī se

sikhā.ī saare zamāna ko mai-kashī maiñ ne

bahār-e-gor-e-ġharībāñ na kyoñ lahad ho mirī

ki jam.a kī hai zamāne kī bekasī maiñ ne

badal ke rañg Darā.e na āsmāñ mujh ko

mizāj-e-yār kī dekhī hai barhamī maiñ ne

batā ke aib-o-hunar sher-goī ke 'afqar'

sikhā.ī apne harīfoñ ko shā.irī maiñ ne

rakhi hai husn pe buniyaad-e-ashiqi main ne

KHushi se maut ko de di hai zindagi main ne

kiya kabhi na siwa tere ghair ko sajda

KHarab-e-shirk na ki rasm-e-bandagi main ne

KHudai mil gai sarkar-e-ishq se mujh ko

KHudi ke badle talab ki jo be-KHudi main ne

chhalakta saghar-e-mai pi ke chashm-e-saqi se

sikhai sare zamana ko mai-kashi main ne

bahaar-e-gor-e-ghariban na kyon lahad ho meri

ki jama ki hai zamane ki bekasi main ne

badal ke rang Darae na aasman mujh ko

mizaj-e-yar ki dekhi hai barhami main ne

bata ke aib-o-hunar sher-goi ke 'afqar'

sikhai apne harifon ko shairi main ne