rakhte hain KHizr se na gharaz rahnuma se hum

rakhte haiñ ḳhizr se na ġharaz rahnumā se ham

chalte haiñ bach ke duur har ik naqsh-e-pā se ham

mānūs ho chale haiñ jo dil kī sadā se ham

shāyad ki jī uThe tirī āvāz-e-pā se ham

yā rab nigāh-e-shauq ko de aur vus.ateñ

ghabrā uThe jamāl-e-jahat-āshnā se ham

maḳhsūs kis ke vāste hai rahmat-e-tamām

pūchheñge ek din ye kisī pārsā se ham

o mast-e-nāz husn tujhe kuchh ḳhabar bhī hai

tujh par nisār hote haiñ kis kis adā se ham

ye kaun chhā gayā hai dil o diida par ki aaj

apnī nazar meñ aap haiñ nā-āshnā se ham

rakhte hain KHizr se na gharaz rahnuma se hum

chalte hain bach ke dur har ek naqsh-e-pa se hum

manus ho chale hain jo dil ki sada se hum

shayad ki ji uThe teri aawaz-e-pa se hum

ya rab nigah-e-shauq ko de aur wusaten

ghabra uThe jamal-e-jahat-ashna se hum

maKHsus kis ke waste hai rahmat-e-tamam

puchhenge ek din ye kisi parsa se hum

o mast-e-naz husn tujhe kuchh KHabar bhi hai

tujh par nisar hote hain kis kis ada se hum

ye kaun chha gaya hai dil o dida par ki aaj

apni nazar mein aap hain na-ashna se hum