rang honTon pe hai mohabbat ka

rang hoñToñ pe hai mohabbat kā

haal jaane hai kaun niyyat kā

sādgī jis kī luuT letī hai

dost niklā hai vo bhī shohrat kā

call par baat kyā huī jānāñ

aa gayā lutf terī qurbat kā

terī qīmat se ḳhuub huuñ vāqif

tū samar hai mirī riyāzat kā

sāniha baar baar guzrā hai

dard kā tishnagī kā vahshat kā

tere dāman ke daaġh kyā dekhūñ

isti'āra hai tū sharāfat kā

khā liyā hai fareb lekin maiñ

āshnā huuñ tirī haqīqat kā

aap to merā haal jānte haiñ

tazkira kyā karūñ zarūrat kā

taaj aur taḳht de diyā 'ahmad'

'aib dekhā nahīñ qayādat kā

rang honTon pe hai mohabbat ka

haal jaane hai kaun niyyat ka

sadgi jis ki luT leti hai

dost nikla hai wo bhi shohrat ka

call par baat kya hui jaanan

aa gaya lutf teri qurbat ka

teri qimat se KHub hun waqif

tu samar hai meri riyazat ka

saniha bar bar guzra hai

dard ka tishnagi ka wahshat ka

tere daman ke dagh kya dekhun

isti'ara hai tu sharafat ka

kha liya hai fareb lekin main

aashna hun teri haqiqat ka

aap to mera haal jaante hain

tazkira kya karun zarurat ka

taj aur taKHt de diya 'ahmad'

'aib dekha nahin qayaadat ka