rang laegi hamari ashk-bari ek din

rang lā.egī hamārī ashk-bārī ek din

diid kī ḳhairāt hogī nā-gahānī ek din

'ishq kī nairangiyoñ meñ ye nahīñ mā'lūm thā

ham ko bhī sahnī paḌegī be-qarārī ek din

garche rūThā hai magar mujh se use nafrat nahīñ

hogā pahlū meñ mire vo āftābī ek din

phuul shabnam ḳhushbueñ haiñ dekhne kī muntazir

gulsitāñ meñ husn kī sad-gul-fishānī ek din

apnī taqsīrāt kā maiñ mo'tarif to huuñ magar

us pe zāhir hogī merī be-gunāhī ek din

mai-kashī se duur haiñ aise raheñge kab talak

shaiḳh sāhib kī luTegī pārsā.ī ek din

is qadar fayyāz honā bhī tumheñ achchhā nahīñ

tum ko le Dūbegī aisī ḳhair-ḳhvāhī ek din

ho 'atā ham ko suḳhan kī āshnā.ī ai ḳhudā

taaki 'fāḳhir' bhī kare gauhar-bayānī ek din

rang laegi hamari ashk-bari ek din

did ki KHairaat hogi na-gahani ek din

'ishq ki nairangiyon mein ye nahin ma'lum tha

hum ko bhi sahni paDegi be-qarari ek din

garche ruTha hai magar mujh se use nafrat nahin

hoga pahlu mein mere wo aaftabi ek din

phul shabnam KHushbuen hain dekhne ki muntazir

gulsitan mein husn ki sad-gul-fishani ek din

apni taqsiraat ka main mo'tarif to hun magar

us pe zahir hogi meri be-gunahi ek din

mai-kashi se dur hain aise rahenge kab talak

shaiKH sahib ki luTegi parsai ek din

is qadar fayyaz hona bhi tumhein achchha nahin

tum ko le Dubegi aisi KHair-KHwahi ek din

ho 'ata hum ko suKHan ki aashnai ai KHuda

taki 'faKHir' bhi kare gauhar-bayani ek din