rang sab dhundle the lekin tirgi itni na thi

rang sab dhuñdle the lekin tīrgī itnī na thī

zindagī pahle bhī TuuTī thī magar bikhrī na thī

kuchh to yuuñ bhī thā sehat se fāsla rakhte the ham

aur kuchh is shahr kī āb-o-havā achchhī na thī

aa.ine ke paas jo chehra thā vo merā hī thā

aa.ine meñ shakl jo ubhrī thī vo merī na thī

is tarah rakhte the ham donoñ ta'alluq kā bharam

TuuT bhī jaate the aur āvāz bhī hotī na thī

jaane vo kaisī ghaḌī thī us se jab bichhḌe 'shakīl'

dil bhī afsurda na thā aur aañkh bhī rotī na thī

rang sab dhundle the lekin tirgi itni na thi

zindagi pahle bhi TuTi thi magar bikhri na thi

kuchh to yun bhi tha sehat se fasla rakhte the hum

aur kuchh is shahr ki aab-o-hawa achchhi na thi

aaine ke pas jo chehra tha wo mera hi tha

aaine mein shakl jo ubhri thi wo meri na thi

is tarah rakhte the hum donon ta'alluq ka bharam

TuT bhi jate the aur aawaz bhi hoti na thi

jaane wo kaisi ghaDi thi us se jab bichhDe 'shakil'

dil bhi afsurda na tha aur aankh bhi roti na thi