rang uD kar raunaq-e-taswir aadhi rah gai

rañg uḌ kar raunaq-e-tasvīr aadhī rah ga.ī

ġham ġhalat karne kī ye tadbīr aadhī rah ga.ī

dekhne vāloñ kī āñkhoñ se nihāñ ik ruḳh rahā

puurī khiñch kar bhī mirī tasvīr aadhī rah ga.ī

mujh se mī.ād-e-asīrī kyā karoge pūchh kar

dīda-var ho jāñch lo zanjīr aadhī rah ga.ī

hosh thā vahshat meñ to sahrā-navardī kā mujhe

be-ḳhudī meñ gardish-e-taqdīr aadhī rah ga.ī

kahte haiñ is meñ hai sāz-e-husn par hai soz-e-ishq

dekh kar gul-bāñg qadr-e-mīr aadhī rah ga.ī

nīm-bāz āñkhoñ ke qurbāñ yuuñ kanakhiyoñ se na dekh

ochhe vāroñ se zad-e-har-tīr aadhī rah ga.ī

vo sarāpā husn hai aur us kā ik ruḳh hai siyāh

chāñd se mahbūb kī tābīr aadhī rah ga.ī

jab javānī josh par aa.ī to vo ruḳhsat hue

zindagī ke qasr kī ta.amīr aadhī rah ga.ī

ġhaur se fitrat ne dekhā ba.ad-e-taḳhlīq-e-huzūr

do jahāñ ke husn kī taḳhmīr aadhī rah ga.ī

'sehr' un kī lantarānī sun ke gosh-e-hosh se

ārzū-e-āshiq-e-dilgīr aadhī rah ga.ī

rang uD kar raunaq-e-taswir aadhi rah gai

gham ghalat karne ki ye tadbir aadhi rah gai

dekhne walon ki aankhon se nihan ek ruKH raha

puri khinch kar bhi meri taswir aadhi rah gai

mujh se miad-e-asiri kya karoge puchh kar

dida-war ho jaanch lo zanjir aadhi rah gai

hosh tha wahshat mein to sahra-nawardi ka mujhe

be-KHudi mein gardish-e-taqdir aadhi rah gai

kahte hain is mein hai saz-e-husn par hai soz-e-ishq

dekh kar gul-bang qadr-e-mir aadhi rah gai

nim-baz aankhon ke qurban yun kanakhiyon se na dekh

ochhe waron se zad-e-har-tir aadhi rah gai

wo sarapa husn hai aur us ka ek ruKH hai siyah

chand se mahbub ki tabir aadhi rah gai

jab jawani josh par aai to wo ruKHsat hue

zindagi ke qasr ki tamir aadhi rah gai

ghaur se fitrat ne dekha baad-e-taKHliq-e-huzur

do jahan ke husn ki taKHmir aadhi rah gai

'sehr' un ki lantarani sun ke gosh-e-hosh se

aarzu-e-ashiq-e-dilgir aadhi rah gai