rangini-e-hayat mein uljha diye gae

rangīni-e-hayāt meñ uljhā diye ga.e

ham asliyat kī raah se bhaTkā diye ga.e

patthar ke ho ke rah ga.e patthar-tarāsh log

ham ā.ina-sifat jo the chaTḳhā diye ga.e

apne hī dil ko 'ishq meñ madfan banā liyā

jitne hasīn ḳhvāb the dafnā diye ga.e

ham se musāfiroñ kā safar rā.egāñ huā

ham manziloñ kī had se hī lauTā diye ga.e

ab aur kis tarah se nibhā.eñge rabt ham

us ne sitāre maañg liye lā diye ga.e

jaane kahāñ chale ga.e tanhā udaas log

ham kis dayār-e-ġhair meñ pahuñchā diye ga.e

pahle to chāhatoñ meñ hue 'umr-bhar zalīl

phir ek roz yuuñ huā Thukrā diye ga.e

ham ko zarā sī aane meñ tāḳhīr kyā huī

tauba tamām raat vo tā’na diye ga.e

ham ko 'karan' udāsiyāñ tohfe meñ dī ga.iiñ

phir us ke baa'd sāġhar-o-mīnā diye ga.e

rangini-e-hayat mein uljha diye gae

hum asliyat ki rah se bhaTka diye gae

patthar ke ho ke rah gae patthar-tarash log

hum aaina-sifat jo the chaTKHa diye gae

apne hi dil ko 'ishq mein madfan bana liya

jitne hasin KHwab the dafna diye gae

hum se musafiron ka safar raegan hua

hum manzilon ki had se hi lauTa diye gae

ab aur kis tarah se nibhaenge rabt hum

us ne sitare mang liye la diye gae

jaane kahan chale gae tanha udas log

hum kis dayar-e-ghair mein pahuncha diye gae

pahle to chahaton mein hue 'umr-bhar zalil

phir ek roz yun hua Thukra diye gae

hum ko zara si aane mein taKHir kya hui

tauba tamam raat wo ta’na diye gae

hum ko 'karan' udasiyan tohfe mein di gain

phir us ke ba'd saghar-o-mina diye gae