ranj-e-duniya fikr-e-uqba jaane kya kya dil mein hai

ranj-e-duniyā fikr-e-uqbā jaane kyā kyā dil meñ hai

zindagī do din kī apnī saikḌoñ mushkil meñ hai

rāh-e-ulfat meñ bahut kuchh ḳhaak bhī chhānī magar

merī jānib se ġhubār ab tak kisī ke dil meñ hai

vo jafā-pesha jafā-jū hai jafā us kī sarisht

jis ko kahte haiñ vafā vo mere āb-o-gil meñ hai

tah-nashīñ ho kar milī mauj-e-havādis se najāt

kashti-e-umr-e-ravāñ ab dāman-e-sāhil meñ hai

saḳht-jānī se mirī paalā agar paḌtā use

dekhtā phir zor kitnā bāzū-e-qātil meñ hai

apnī apnī gā rahe haiñ donoñ shaiḳh-o-barhaman

dair-o-kā'ba meñ kahāñ hai jo harīm-e-dil meñ hai

marhale har roz insāñ ko na.e aate haiñ pesh

aaj us manzil meñ hai kal dūsrī manzil meñ hai

kuchh to pās-e-husn kuchh un kī nazar kā sāmnā

vo zabāñ par lā nahīñ saktā jo mere dil meñ hai

jāntā huuñ go ma.āl-e-hazrat-e-ādam magar

kū-e-jānāñ kī tamannā phir bhī mere dil meñ hai

dekhiye ā.īna-e-pīrī meñ phir bachpan kā haal

'ahd-e-māzī kī jhalak kuchh ahd-e-mustaqbil meñ hai

soch kar fariyād kā anjām maiñ ḳhāmosh huuñ

varna ab bhī quvvat-e-fariyād mere dil meñ hai

hai shikast-e-be-sutūñ me.ār-e-istedād-e-ishq

kohkan kā naam fard-e-jauhar-e-qābil meñ hai

ishq-e-majnūñ ne kuchh ūñchā kar diyā meyār-e-husn

varna lailā kī haqīqat parda-e-mahmil meñ hai

koī hai sāġhar-ba-kaf koī surāhī-dar-baġhal

tishna-kām ab tak magar 'sho.ala' tirī mahfil meñ hai

ranj-e-duniya fikr-e-uqba jaane kya kya dil mein hai

zindagi do din ki apni saikDon mushkil mein hai

rah-e-ulfat mein bahut kuchh KHak bhi chhani magar

meri jaanib se ghubar ab tak kisi ke dil mein hai

wo jafa-pesha jafa-ju hai jafa us ki sarisht

jis ko kahte hain wafa wo mere aab-o-gil mein hai

tah-nashin ho kar mili mauj-e-hawadis se najat

kashti-e-umr-e-rawan ab daman-e-sahil mein hai

saKHt-jaani se meri pala agar paDta use

dekhta phir zor kitna bazu-e-qatil mein hai

apni apni ga rahe hain donon shaiKH-o-barhaman

dair-o-ka'ba mein kahan hai jo harim-e-dil mein hai

marhale har roz insan ko nae aate hain pesh

aaj us manzil mein hai kal dusri manzil mein hai

kuchh to pas-e-husn kuchh un ki nazar ka samna

wo zaban par la nahin sakta jo mere dil mein hai

jaanta hun go maal-e-hazrat-e-adam magar

ku-e-jaanan ki tamanna phir bhi mere dil mein hai

dekhiye aaina-e-piri mein phir bachpan ka haal

'ahd-e-mazi ki jhalak kuchh ahd-e-mustaqbil mein hai

soch kar fariyaad ka anjam main KHamosh hun

warna ab bhi quwwat-e-fariyaad mere dil mein hai

hai shikast-e-be-sutun mear-e-istedad-e-ishq

kohkan ka nam fard-e-jauhar-e-qabil mein hai

ishq-e-majnun ne kuchh uncha kar diya meyar-e-husn

warna laila ki haqiqat parda-e-mahmil mein hai

koi hai saghar-ba-kaf koi surahi-dar-baghal

tishna-kaam ab tak magar 'shoala' teri mahfil mein hai