ranjishen miT bhi gain to kuchh gila rah jaega

ranjisheñ miT bhī ga.iiñ to kuchh gila rah jā.egā

mere us ke darmiyāñ ik fāsla rah jā.egā

rafta-rafta bhuul jā.ūñgī use maiñ ek din

yaad kā baaqī magar kuchh silsila rah jā.egā

ye musāfir do ghaḌī bas sū-e-manzil haiñ ravāñ

sab chale jā.eñge ḳhālī rāsta rah jā.egā

yūñhī gar ik dūsre se phir bichhaḌ jā.eñge ham

ho ke phir koī na koī hādsa rah jā.egā

barg ho jā.eñge ik din shāḳh se apnī judā

'aks miT jā.eñge lekin aa.ina rah jā.egā

har taraf jab āñdhiyāñ vahshat bapā kar jā.eñgī

chār-sū phir vahshatoñ kā dā.era rah jā.egā

un ke ḳhat kā aasrā 'azrā' agar jaatā rahā

phir hamāre darmiyāñ kyā rābta rah jā.egā

ranjishen miT bhi gain to kuchh gila rah jaega

mere us ke darmiyan ek fasla rah jaega

rafta-rafta bhul jaungi use main ek din

yaad ka baqi magar kuchh silsila rah jaega

ye musafir do ghaDi bas su-e-manzil hain rawan

sab chale jaenge KHali rasta rah jaega

yunhi gar ek dusre se phir bichhaD jaenge hum

ho ke phir koi na koi hadsa rah jaega

barg ho jaenge ek din shaKH se apni juda

'aks miT jaenge lekin aaina rah jaega

har taraf jab aandhiyan wahshat bapa kar jaengi

chaar-su phir wahshaton ka daera rah jaega

un ke KHat ka aasra 'azra' agar jata raha

phir hamare darmiyan kya rabta rah jaega