raqs-e-wahshat ki junun-KHez faza tari hai

raqs-e-vahshat kī junūñ-ḳhez fazā taarī hai

uTh ke sahrā kī taraf chalne kī tayyārī hai

maiñ to so jaatā huuñ par chīḳhtā rahtā hai badan

merī miTTī meñ 'ajab tarz-e-'azā-dārī hai

ham-safīro koī bai'at nahīñ karnī hai hameñ

is tabī'at pe ye ik ranj-e-girāñ-bārī hai

shahr-e-be-mehr hai sakte meñ to hairat kaisī

amn ke dā’ī-e-avval kī giraftārī hai

tum kaho tum bhī taḌapte ho ta'alluq ke ta.iiñ

yā mire hī dil-e-bismil kī ye bīmārī hai

mastī-e-shauq meñ bhī band-e-qabā bāñdhtā huuñ

ye mire chaak garebān kī hushyārī hai

sarhad-e-jāñ se dhuāñ yūñhī nahīñ uThtā hai

koī siine meñ sulagtī huī chingārī hai

raqs-e-wahshat ki junun-KHez faza tari hai

uTh ke sahra ki taraf chalne ki tayyari hai

main to so jata hun par chiKHta rahta hai badan

meri miTTi mein 'ajab tarz-e-'aza-dari hai

ham-safiro koi bai'at nahin karni hai hamein

is tabi'at pe ye ek ranj-e-giran-bari hai

shahr-e-be-mehr hai sakte mein to hairat kaisi

amn ke da’i-e-awwal ki giraftari hai

tum kaho tum bhi taDapte ho ta'alluq ke tain

ya mere hi dil-e-bismil ki ye bimari hai

masti-e-shauq mein bhi band-e-qaba bandhta hun

ye mere chaak gareban ki hushyari hai

sarhad-e-jaan se dhuan yunhi nahin uThta hai

koi sine mein sulagti hui chingari hai