رقص وحشت کی جنوں خیز فضا طاری ہے

رقص وحشت کی جنوں خیز فضا طاری ہے

اٹھ کے صحرا کی طرف چلنے کی تیاری ہے

میں تو سو جاتا ہوں پر چیختا رہتا ہے بدن

میری مٹی میں عجب طرز عزا داری ہے

ہم صفیرو کوئی بیعت نہیں کرنی ہے ہمیں

اس طبیعت پہ یہ اک رنج گراں باری ہے

شہر بے مہر ہے سکتے میں تو حیرت کیسی

امن کے داعیٔ اول کی گرفتاری ہے

تم کہو تم بھی تڑپتے ہو تعلق کے تئیں

یا مرے ہی دل بسمل کی یہ بیماری ہے

مستئ شوق میں بھی بند قبا باندھتا ہوں

یہ مرے چاک گریبان کی ہشیاری ہے

سرحد جاں سے دھواں یوں ہی نہیں اٹھتا ہے

کوئی سینے میں سلگتی ہوئی چنگاری ہے