raqs mein sath jo sahra ko bhi Dhaale hue hain

raqs meñ saath jo sahrā ko bhī Dhāle hue haiñ

ye kisī shahr-e-tamannā ke nikāle hue haiñ

rang-o-roġhan haiñ tire jism kā ye gard-o-ġhubār

terī zulfeñ haiñ badan par jo ye jaale hue haiñ

aah ko saaz banāte haiñ dukhoñ kī rut meñ

dil-shikasta haiñ par āvāz sañbhāle hue haiñ

dekhiye aur hameñ dekh ke hairat kiije

vo hiran haiñ ki jo barsāt meñ kaale hue haiñ

kaun sī aag meñ jaltā hai ye andar andar

bahte dariyā ke badan par jo ye chhāle hue haiñ

maiñ ne ḳhud apnī tabāhī ke maze luuTe haiñ

aur hairān mire chāhne vaale hue haiñ

qaid ho paanā ḳhayāloñ kā kahāñ mumkin hai

vaise zanjīr to ham paañv meñ Daale hue haiñ

raqs mein sath jo sahra ko bhi Dhaale hue hain

ye kisi shahr-e-tamanna ke nikale hue hain

rang-o-roghan hain tere jism ka ye gard-o-ghubar

teri zulfen hain badan par jo ye jale hue hain

aah ko saz banate hain dukhon ki rut mein

dil-shikasta hain par aawaz sanbhaale hue hain

dekhiye aur hamein dekh ke hairat kije

wo hiran hain ki jo barsat mein kale hue hain

kaun si aag mein jalta hai ye andar andar

bahte dariya ke badan par jo ye chhaale hue hain

main ne KHud apni tabahi ke maze luTe hain

aur hairan mere chahne wale hue hain

qaid ho pana KHayalon ka kahan mumkin hai

waise zanjir to hum panw mein Dale hue hain