rasan-o-dar se ya ku-e-butan se uTThe

rasan-o-dār se yā kū-e-butāñ se uTThe

fitna har haal meñ fitna hai jahāñ se uTThe

kitne jāñ-soz o dil-āvez haiñ vo naġhme bhī

sho.ala ban kar jo mire husn-e-bayāñ se uTThe

donoñ aalam meñ kahīñ un ko Thikānā na milā

jo tirī bazm se uTThe vo jahāñ se uTThe

haa.e vo naale ki jo arsh-e-barīñ tak pahuñche

uf vo tūfāñ jo mire ashk-e-ravāñ se uTThe

kashish-e-husn ne ik gaam bhī chalne na diyā

phir vahīñ baiTh ga.e log jahāñ se uTThe

kaam kuchh kar na sakā vā.iz-e-nādāñ kā tilism

kitne tūfāñ mirī ḳhāmosh fuġhāñ se uTThe

in hijābāt kī azmat ko kahūñ kyā 'jauhar'

jo yaqīñ ban ke mire vahm-o-gumāñ se uTThe

rasan-o-dar se ya ku-e-butan se uTThe

fitna har haal mein fitna hai jahan se uTThe

kitne jaan-soz o dil-awez hain wo naghme bhi

shoala ban kar jo mere husn-e-bayan se uTThe

donon aalam mein kahin un ko Thikana na mila

jo teri bazm se uTThe wo jahan se uTThe

hae wo nale ki jo arsh-e-barin tak pahunche

uf wo tufan jo mere ashk-e-rawan se uTThe

kashish-e-husn ne ek gam bhi chalne na diya

phir wahin baiTh gae log jahan se uTThe

kaam kuchh kar na saka waiz-e-nadan ka tilism

kitne tufan meri KHamosh fughan se uTThe

in hijabaat ki azmat ko kahun kya 'jauhar'

jo yaqin ban ke mere wahm-o-guman se uTThe