rasta bahut aasan laga hum ko wahan tak

rasta bahut āsān lagā ham ko vahāñ tak

saa.e tirī palkoñ ke rahe saath jahāñ tak

kyā hogā agar Tuut ga.ī niiñd hamārī

ham aa to ga.e ḳhvāb meñ chal kar ke yahāñ tak

samjho to zarā hotī hai kyā pyaas kī shiddat

aao to zarā saath mire jū-e-ravāñ tak

kyā so ga.e bastī ke sabhī log sar-e-shām

kyoñ chhat pe kisī ghar kī nahīñ aaj dhuāñ tak

ab soch rahā huuñ ye anā toḌ hī Dālūñ

laḌtā rahūñ parchhā.īñ se maiñ apnī kahāñ tak

sar apnā paTaktī haiñ vahāñ aaj bhī maujeñ

pahuñchā hī nahīñ paanī jahāñ tishna-labāñ tak

ahbāb 'nafīs' aap ko ab DhūñDeñ bhī kyūñkar

sahrā meñ to kho jaate haiñ qadmoñ ke nishāñ tak

rasta bahut aasan laga hum ko wahan tak

sae teri palkon ke rahe sath jahan tak

kya hoga agar Tut gai nind hamari

hum aa to gae KHwab mein chal kar ke yahan tak

samjho to zara hoti hai kya pyas ki shiddat

aao to zara sath mere ju-e-rawan tak

kya so gae basti ke sabhi log sar-e-sham

kyon chhat pe kisi ghar ki nahin aaj dhuan tak

ab soch raha hun ye ana toD hi Dalun

laDta rahun parchhain se main apni kahan tak

sar apna paTakti hain wahan aaj bhi maujen

pahuncha hi nahin pani jahan tishna-laban tak

ahbab 'nafis' aap ko ab DhunDen bhi kyunkar

sahra mein to kho jate hain qadmon ke nishan tak