raushan dil-e-arif se fuzun hai badan un ka

raushan dil-e-ārif se fuzūñ hai badan un kā

rangīñ hai tabī'at kī tarah pairahan un kā

mahrūm hī rah jaatī hai āġhosh-e-tamannā

sharm aa ke churā letī hai saarā badan un kā

jin logoñ ne dil meñ tire ghar apnā kiyā hai

bāhar hai do-ālam se mirī jaañ vatan un kā

har baat meñ vo chaal kiyā karte haiñ mujh se

ulfat na nibhegī jo yahī hai chalan un kā

aariz se ġharaz ham ko anādil ko hai gul se

hai kūcha-e-māshūq hamārā chaman un kā

hai saaf nigāhoñ se 'ayāñ josh-e-javānī

āñkhoñ se sañbhaltā nahīñ mastāna-pan un kā

ye sharm ke mā'nī haiñ hayā kahte haiñ is ko

āġhosh-e-tasavvur meñ na aayā badan un kā

ġhairoñ hī pe chaltā hai jo ab naaz kā ḳhanjar

kyuuñ biich meñ laayā thā mujhe bāñkpan un kā

ġhairoñ ne kabhī paak nazar se nahīñ dekhā

vo us ko na samjheñ to ye hai husn-e-zan un kā

is zulf-o-ruḳh-o-lab pe unheñ kyuuñ na ho naḳhvat

tātār hai un kā halab un kā yaman un kā

allāh re fareb-e-nazar-e-chashm-e-fusūñ-sāz

banda hai har ik shaiḳh har ik barhaman un kā

aayā jo nazar husn-e-ḳhudā-dād kā jalva

but ban gayā muñh dekh ke har barhaman un kā

marqad meñ utārā hameñ tevrī ko chaḌhā kar

ham mar bhī ga.e par na chhuTā bāñkpan un kā

guzrī huī bāteñ na mujhe yaad dilāo

ab zikr hī jaane do tum ai jān-e-man un kā

dilchasp hī aafat hai qayāmat hai ġhazab hai

baat un kī adā un kī qad un kā chalan un kā

raushan dil-e-arif se fuzun hai badan un ka

rangin hai tabi'at ki tarah pairahan un ka

mahrum hi rah jati hai aaghosh-e-tamanna

sharm aa ke chura leti hai sara badan un ka

jin logon ne dil mein tere ghar apna kiya hai

bahar hai do-alam se meri jaan watan un ka

har baat mein wo chaal kiya karte hain mujh se

ulfat na nibhegi jo yahi hai chalan un ka

aariz se gharaz hum ko anadil ko hai gul se

hai kucha-e-mashuq hamara chaman un ka

hai saf nigahon se 'ayan josh-e-jawani

aankhon se sanbhalta nahin mastana-pan un ka

ye sharm ke ma'ni hain haya kahte hain is ko

aaghosh-e-tasawwur mein na aaya badan un ka

ghairon hi pe chalta hai jo ab naz ka KHanjar

kyun bich mein laya tha mujhe bankpan un ka

ghairon ne kabhi pak nazar se nahin dekha

wo us ko na samjhen to ye hai husn-e-zan un ka

is zulf-o-ruKH-o-lab pe unhen kyun na ho naKHwat

tatar hai un ka halab un ka yaman un ka

allah re fareb-e-nazar-e-chashm-e-fusun-saz

banda hai har ek shaiKH har ek barhaman un ka

aaya jo nazar husn-e-KHuda-dad ka jalwa

but ban gaya munh dekh ke har barhaman un ka

marqad mein utara hamein tewri ko chaDha kar

hum mar bhi gae par na chhuTa bankpan un ka

guzri hui baaten na mujhe yaad dilao

ab zikr hi jaane do tum ai jaan-e-man un ka

dilchasp hi aafat hai qayamat hai ghazab hai

baat un ki ada un ki qad un ka chalan un ka