raushni aur rang ke raqsan sarabon ki taraf

raushnī aur rang ke raqsāñ sarāboñ kī taraf

aao tum ko le chaleñ ham apne ḳhvāboñ kī taraf

kaisī kaisī mahfileñ barpā kiye baiThe haiñ ham

dekh lo aakar kabhī apne ḳharāboñ kī taraf

bhuul baiThe the zamīñ ke aadmī kī sarhadeñ

ham bhī maa.il ho ga.e the māhtāboñ kī taraf

zindagī pahle savāloñ par hamāre hañs paḌī

phir ishāra kar diyā sūkhe gulāboñ kī taraf

ham kitāboñ se nikal kar zindagī paḌhne ga.e

thak ke lekin lauT aa.e phir kitāboñ kī taraf

ham kabhī tai hī nahīñ kar paa.e apnī kaifiyat

kab gunāhoñ kī taraf haiñ kab savāboñ kī taraf

raushni aur rang ke raqsan sarabon ki taraf

aao tum ko le chalen hum apne KHwabon ki taraf

kaisi kaisi mahfilen barpa kiye baiThe hain hum

dekh lo aakar kabhi apne KHarabon ki taraf

bhul baiThe the zamin ke aadmi ki sarhaden

hum bhi mail ho gae the mahtabon ki taraf

zindagi pahle sawalon par hamare hans paDi

phir ishaara kar diya sukhe gulabon ki taraf

hum kitabon se nikal kar zindagi paDhne gae

thak ke lekin lauT aae phir kitabon ki taraf

hum kabhi tai hi nahin kar pae apni kaifiyat

kab gunahon ki taraf hain kab sawabon ki taraf