reg-e-yaKH-basta ko pahle aag par rakkha gaya

reg-e-yaḳh-basta ko pahle aag par rakkhā gayā

phir hamāre jism ko us ret par rakkhā gayā

jazba-e-iḳhlās kī us ko sazā aise milī

umr-bhar vo pattharoñ se bāñdh kar rakkhā gayā

har taraf ik nuur kā sailāb sā jaarī huā

neza-e-zulmāt par sūraj kā sar rakkhā gayā

zindagī ne ek pal bhī na diyā mujh ko sukūñ

merī qismat meñ hamesha kā safar rakkhā gayā

ek muddat se haiñ vīrāñ qasr-e-dil ke tāqche

kyoñ charāġhoñ ko jalā kar taaq par rakkhā gayā

ḳhvāb-e-shīrīñ kī bashārat dī ga.ī pahle mujhe

aur phir āñkhoñ ko merī baam par rakkhā gayā

kyā banā.egā mujhe ye kūza-gar ko hai ḳhabar

āḳhirash miTTī ko merī ḳhaak par rakkhā gayā

mehr ko pahle hifāzat par kiyā māmūr phir

us ridā-e-sabz par āb-e-guhar rakkhā gayā

jaane kitne āshiyāñ the raah meñ us kī magar

kyoñ hadaf par bijliyoñ ke merā ghar rakkhā gayā

dasht-e-jāñ meñ har taraf phailī huī thī tīrgī

aur jugnū ko hamāre haath par rakkhā gayā

vo hañsā aur hañs ke us ne Daal dī apnī sipar

jab shikhanDī jang meñ sīna-sipar rakkhā gayā

reg-e-yaKH-basta ko pahle aag par rakkha gaya

phir hamare jism ko us ret par rakkha gaya

jazba-e-iKHlas ki us ko saza aise mili

umr-bhar wo pattharon se bandh kar rakkha gaya

har taraf ek nur ka sailab sa jari hua

neza-e-zulmat par suraj ka sar rakkha gaya

zindagi ne ek pal bhi na diya mujh ko sukun

meri qismat mein hamesha ka safar rakkha gaya

ek muddat se hain viran qasr-e-dil ke taqche

kyon charaghon ko jala kar taq par rakkha gaya

KHwab-e-shirin ki bashaarat di gai pahle mujhe

aur phir aankhon ko meri baam par rakkha gaya

kya banaega mujhe ye kuza-gar ko hai KHabar

aaKHirash miTTi ko meri KHak par rakkha gaya

mehr ko pahle hifazat par kiya mamur phir

us rida-e-sabz par aab-e-guhar rakkha gaya

jaane kitne aashiyan the rah mein us ki magar

kyon hadaf par bijliyon ke mera ghar rakkha gaya

dasht-e-jaan mein har taraf phaili hui thi tirgi

aur jugnu ko hamare hath par rakkha gaya

wo hansa aur hans ke us ne Dal di apni sipar

jab shikhanDi jang mein sina-sipar rakkha gaya