rishta-e-dil usi se milta hai

rishta-e-dil usī se miltā hai

jo koī sādgī se miltā hai

baiTh jaatā hai dil mirā aksar

jab koī bebasī se miltā hai

haa.e afsos merā rasta bhī

bevafā kī galī se miltā hai

rāz-e-dil kyā sunā gayā us ko

tab se vo be-dilī se miltā hai

umr bhar jo mujhe satā.egā

har ghaḌī be-kalī se miltā hai

bhuul paanā jise nahīñ mumkin

phuul ban kar hañsī se miltā hai

jis ke dil meñ jagah nahīñ merī

merā dil bhī usī se miltā hai

hāl-e-dil ab zabāñ nahīñ kahtī

aañkh kī is tarī se miltā hai

kyā 'nisār' āj-kal koī lamha

aap se bhī ḳhushī se miltā hai

rishta-e-dil usi se milta hai

jo koi sadgi se milta hai

baiTh jata hai dil mera aksar

jab koi bebasi se milta hai

hae afsos mera rasta bhi

bewafa ki gali se milta hai

raaz-e-dil kya suna gaya us ko

tab se wo be-dili se milta hai

umr bhar jo mujhe sataega

har ghaDi be-kali se milta hai

bhul pana jise nahin mumkin

phul ban kar hansi se milta hai

jis ke dil mein jagah nahin meri

mera dil bhi usi se milta hai

haal-e-dil ab zaban nahin kahti

aankh ki is tari se milta hai

kya 'nisar' aaj-kal koi lamha

aap se bhi KHushi se milta hai