ro ro ke dil ka aalam sarshaar kar ke dekhun

ro ro ke dil kā 'ālam sarshār kar ke dekhūñ

chup rah ke us ko dekhūñ guftār kar ke dekhūñ

kis lafz-e-kun se us ne taḳhlīq kī hamārī

sau-sau tarah se ḳhud ko iz.hār kar ke dekhūñ

maiñ apne irtiqā se kuchh mutma.in nahīñ huuñ

so apnī vus'atoñ ko dīvār kar ke dekhūñ

hāsil na kar sakā maiñ us ko riyāzatoñ se

ik baar ḳhud ko phir se bekār kar ke dekhūñ

yuuñ bhī to dil kī qīmat girtī hī jā rahī hai

ghar se ise nikālūñ bāzār kar ke dekhūñ

dekhūñ tirī himāyat kartā hai kaun 'sānī'

tujh be-amāñ pe ik din maiñ vaar kar ke dekhūñ

ro ro ke dil ka 'alam sarshaar kar ke dekhun

chup rah ke us ko dekhun guftar kar ke dekhun

kis lafz-e-kun se us ne taKHliq ki hamari

sau-sau tarah se KHud ko izhaar kar ke dekhun

main apne irtiqa se kuchh mutmain nahin hun

so apni wus'aton ko diwar kar ke dekhun

hasil na kar saka main us ko riyazaton se

ek bar KHud ko phir se bekar kar ke dekhun

yun bhi to dil ki qimat girti hi ja rahi hai

ghar se ise nikalun bazar kar ke dekhun

dekhun teri himayat karta hai kaun 'sani'

tujh be-aman pe ek din main war kar ke dekhun