روک سکتا تھا کسی کو میں مگر جانے دیا

روک سکتا تھا کسی کو میں مگر جانے دیا

مجھ میں کوئی مر رہا تھا میں نے مر جانے دیا

خواب تھا آنکھوں میں میری میں نے آنکھیں کھول دیں

اور اس خوشبو کو سارے میں بکھر جانے دیا

رفتہ رفتہ دل کو دنیا کی ہوا راس آ گئی

رفتہ رفتہ ہم نے اپنا زخم بھر جانے دیا

اور اب وہ لوگ میری راہ کی دیوار ہیں

جن کو میں نے اپنے اندر سے گزر جانے دیا

شام کوئی دل سے ہو کر جا رہا تھا آفتاب

ہم نے دیکھا اک نظر اور دیکھ کر جانے دیا