roz lashen hi nikalti hain jo aKHbaron ke bich

roz lāsheñ hī nikaltī haiñ jo aḳhbāroñ ke biich

qabr kī buniyād hogī ghar kī dīvāroñ ke biich

kaun sā vo sāniha thā jis ne pāgal kar diyā

kin ke chehre DhūñDte haiñ log bāzāroñ ke biich

likh do ulTe naam kī taḳhtī yahāñ par lag ga.ī

kaun ġham-ḳhvārī karegā ham se be-zāroñ ke biich

jaane kis kā muntazir hai kuchh bhī ye kahtā nahīñ

raat bhar ik aa.ina jaage hai dīvāroñ ke biich

raunaq-e-bāzār kī ham ko ḳhabar hotī hai ḳhuub

shahr-e-āvāra phire kyoñ ham se bīmāroñ ke biich

do dinoñ kī chāñdnī kā hai tamāshā aur kyā

muflisī phir aa basegī in hī galiyāroñ ke biich

koī to rasta nikāleñ un kī sohbat kā 'shamīm'

jism kī baisākhiyāñ TuuTī haiñ nādāroñ ke biich

roz lashen hi nikalti hain jo aKHbaron ke bich

qabr ki buniyaad hogi ghar ki diwaron ke bich

kaun sa wo saniha tha jis ne pagal kar diya

kin ke chehre DhunDte hain log bazaron ke bich

likh do ulTe nam ki taKHti yahan par lag gai

kaun gham-KHwari karega hum se be-zaron ke bich

jaane kis ka muntazir hai kuchh bhi ye kahta nahin

raat bhar ek aaina jage hai diwaron ke bich

raunaq-e-bazar ki hum ko KHabar hoti hai KHub

shahr-e-awara phire kyon hum se bimaron ke bich

do dinon ki chandni ka hai tamasha aur kya

muflisi phir aa basegi in hi galiyaron ke bich

koi to rasta nikalen un ki sohbat ka 'shamim'

jism ki baisakhiyan TuTi hain nadaron ke bich