روز و شب ہے مری جستجو آئنہ

روز و شب ہے مری جستجو آئنہ

دشت و کوہ و دمن کو بہ کو آئنہ

عکس در عکس پھیلا ہے اک سلسلہ

عالم ہو میں ہے ایک ہو آئنہ

دیکھ اپنے بھی آ کر مقابل کبھی

روز رکھتا ہے تو روبرو آئنہ

کچھ ہمیں بھی بتا کچھ ہمیں بھی سنا

تجھ سے کرتا ہے کیا گفتگو آئنہ

جو بھی ہے صاف کہہ دے منافق نہ بن

دیکھ موتی سی ہے آبرو آئنہ

حاسدوں کے جو تیروں سے دل پر لگیں

زخم کرتا ہے وہ بھی رفو آئنہ

مدتوں بعد خسروؔ یہ مجھ پر کھلا

میں ترا عکس میرا ہے تو آئنہ