رخ زردار پر ہر دم دمکتی شادمانی ہے

رخ زردار پر ہر دم دمکتی شادمانی ہے

مگر مفلس کے چہرہ سے عیاں غم کی نشانی ہے

تم اپنی داستان غم ذرا کھل کر کہو مجھ سے

مرے برباد ہونے کی تو اک لمبی کہانی ہے

اگر کچھ سوچنا ہے عاقبت کی سوچ اے ناداں

بھروسہ کیا ہے دنیا کا یہ دنیا آنی جانی ہے

بڑی مدت سے خواہش ہے گزاریں ساتھ کچھ لمحے

تمہارے شہر کی ہر شام سنتے ہیں سہانی ہے

کہیں بھولے سے بھی اس سے نہ دل کی بات کہہ دینا

مزاج یار میں کچھ آج تلخی ہے گرانی ہے

یہ کیسے موڑ پر تو زندگی لے آئی ہے مجھ کو

جہاں دل میں کوئی غم ہے نہ کوئی شادمانی ہے

لو اب تو اہل فکر و فن بھی کہتے ہیں سر محفل

تیرے اشعار میں اے شوقؔ شوخی ہے روانی ہے