روداد غم میں ڈھونڈئیے لطف بیاں نہیں

روداد غم میں ڈھونڈئیے لطف بیاں نہیں

یہ تو حدیث دل ہے کوئی داستاں نہیں

شکوہ نہیں گلہ نہیں آہ و فغاں نہیں

اپنا جو حال ہے وہ کسی پر عیاں نہیں

اپنا یقیں کبھی بھی اسیر‌ گماں نہیں

اے شیخ ان کے میرے کوئی درمیاں نہیں

اے دل جفائے اہل جہاں سے نہ ہو ملول

ان کی رضا جو ہو تو مصیبت گراں نہیں

کیا ڈھونڈھتا ہے اس میں غم و رنج کے سوا

یہ میری داستاں ہے تری داستاں نہیں

عشق ستم سمجھ کے ذرا اے نگاہ دوست

یہ تیرا امتحاں ہے مرا امتحاں نہیں

حیران ہوں وہاں میں کہوں کیا زبان سے

آسیؔ نگاہ دل کی جہاں ترجماں نہیں