samne ek kitab adh-khuli aur main

sāmne ik kitāb adh-khulī aur maiñ

be-sabab sham.a jaltī huī aur maiñ

be-sadā ek naġhme ke haiñ muntazir

daf bajātī huī ḳhāmushī aur maiñ

vaqt kī kokh kā bar-mahal sāneha

ye jahāñ muztarib zindagī aur maiñ

kuchh parind āsmāñ se utarte hue

lutf-andoz jin se nadī aur maiñ

vaqt kī shāḳh par ḳhushnumā phuul the

vo galī husn kī sādgī aur maiñ

gardish-e-rañg-o-bū mish.aleñ aur tū

be-karāñ ik ḳhalā tīrgī aur maiñ

jism dhañsne lagā raat kī qabr meñ

phir vahī ḳhvāb kī āgahī aur maiñ

jism par reñg uThīñ be-badan chīTiyāñ

phir vahī dhuup sī chāñdnī aur maiñ

samne ek kitab adh-khuli aur main

be-sabab shama jalti hui aur main

be-sada ek naghme ke hain muntazir

daf bajati hui KHamushi aur main

waqt ki kokh ka bar-mahal saneha

ye jahan muztarib zindagi aur main

kuchh parind aasman se utarte hue

lutf-andoz jin se nadi aur main

waqt ki shaKH par KHushnuma phul the

wo gali husn ki sadgi aur main

gardish-e-rang-o-bu mishalen aur tu

be-karan ek KHala tirgi aur main

jism dhansne laga raat ki qabr mein

phir wahi KHwab ki aagahi aur main

jism par reng uThin be-badan chiTiyan

phir wahi dhup si chandni aur main