sans lene ko ye duniya ki pawan Thik nahin

saañs lene ko ye duniyā kī pavan Thiik nahīñ

aur phir in dinoñ merā bhī to man Thiik nahīñ

is kī bharpā.ī meñ 'umreñ kahīñ na ban meñ kaTeñ

tum jo har baat pe dete ho vachan Thiik nahīñ

roz hī dekhtī huuñ phone meñ terā number

roz hī sochtī huuñ itnī lagan Thiik nahīñ

shā'iroñ se kaho ḳhushiyoñ kī bhī bāteñ kar leñ

dard meñ Duubā huā itnā suḳhan Thiik nahīñ

kaise us pyaar bharī laḌkī ko ye samjhā.ūñ

vo jo rahtī hai tirī dhun meñ magan Thiik nahīñ

she'r apne kisī kam-zarf ke aage na sunā

dil ke rishtoñ meñ dimāġhoñ kā chalan Thiik nahīñ

mujh se ab karne lage baat dar-o-bām mire

khiḌkiyoñ ne bhī kahā itnī ghuTan Thiik nahīñ

apnī shartoñ pe bhalā kis liye jiinā chhoḌūñ

shyām ne kab kahā miirā ke bhajan Thiik nahīñ

sans lene ko ye duniya ki pawan Thik nahin

aur phir in dinon mera bhi to man Thik nahin

is ki bharpai mein 'umren kahin na ban mein kaTen

tum jo har baat pe dete ho wachan Thik nahin

roz hi dekhti hun phone mein tera number

roz hi sochti hun itni lagan Thik nahin

sha'iron se kaho KHushiyon ki bhi baaten kar len

dard mein Duba hua itna suKHan Thik nahin

kaise us pyar bhari laDki ko ye samjhaun

wo jo rahti hai teri dhun mein magan Thik nahin

she'r apne kisi kam-zarf ke aage na suna

dil ke rishton mein dimaghon ka chalan Thik nahin

mujh se ab karne lage baat dar-o-baam mere

khiDkiyon ne bhi kaha itni ghuTan Thik nahin

apni sharton pe bhala kis liye jina chhoDun

shyam ne kab kaha mera ke bhajan Thik nahin