saqi ye pila usko jo ho jam se waqif

saaqī ye pilā us ko jo ho jaam se vāqif

ham aaj talak mai ke nahīñ naam se vāqif

mastī ke sivā daur meñ us chashm-e-siyah ke

kāfir ho jo ho gardish-e-ayyām se vāqif

mar kar bhī tah-e-ḳhāk na āsūda hue aah

ai ishq na the ham tire anjām se vāqif

sayyād kī ulfat se phañse aan ke varna

the kaahe ko ham is qafas o daam se vāqif

milne kā payām us se kaho jā ke azīzo

jo us ke na ho vasl ke paiġhām se vāqif

auroñ se qasam khā.iye aur ham to mirī jaañ

haiñ ḳhuub tumhārī qasam-aqsām se vāqif

koī nahīñ kartā jo kiyā tū ne 'nazīr' aah

dil us ko diyā jis ke nahīñ naam se vāqif

saqi ye pila us ko jo ho jam se waqif

hum aaj talak mai ke nahin nam se waqif

masti ke siwa daur mein us chashm-e-siyah ke

kafir ho jo ho gardish-e-ayyam se waqif

mar kar bhi tah-e-KHak na aasuda hue aah

ai ishq na the hum tere anjam se waqif

sayyaad ki ulfat se phanse aan ke warna

the kahe ko hum is qafas o dam se waqif

milne ka payam us se kaho ja ke azizo

jo us ke na ho wasl ke paigham se waqif

auron se qasam khaiye aur hum to meri jaan

hain KHub tumhaari qasam-aqsam se waqif

koi nahin karta jo kiya tu ne 'nazir' aah

dil us ko diya jis ke nahin nam se waqif