saqiya kaun gaya ruTh ke maiKHane se

sāqiyā kaun gayā ruuTh ke maiḳhāne se

jaam mil mil ke gale rote haiñ paimāne se

hai vahī kashmakash-e-zīst kā 'ālam ab tak

bār-e-ġham aaj bhī kam ho na sakā shāne se

ab to is peḌ ke saa.e se bhī Dar lagtā hai

qāfile kitne luTe haiñ yahāñ ruk jaane se

aap is ghar meñ jo aa.e haiñ to yuuñ lagtā hai

chāñdnī khel rahī hai kisī vīrāne se

shīsha-e-dil ko judā sang-diloñ se rakhnā

Tuut saktā hai kisī vaqt bhī Takrāne se

merā ġham to ġham-e-duniyā hai zamāne vaalo

is ko tashbīh na do qais ke afsāne se

kis kī qismat meñ likhā kis ko pata kyā 'ġhaibī'

kaam apnā hai faqat yaar ke yārāne se

saqiya kaun gaya ruTh ke maiKHane se

jam mil mil ke gale rote hain paimane se

hai wahi kashmakash-e-zist ka 'alam ab tak

bar-e-gham aaj bhi kam ho na saka shane se

ab to is peD ke sae se bhi Dar lagta hai

qafile kitne luTe hain yahan ruk jaane se

aap is ghar mein jo aae hain to yun lagta hai

chandni khel rahi hai kisi virane se

shisha-e-dil ko juda sang-dilon se rakhna

Tut sakta hai kisi waqt bhi Takrane se

mera gham to gham-e-duniya hai zamane walo

is ko tashbih na do qais ke afsane se

kis ki qismat mein likha kis ko pata kya 'ghaibi'

kaam apna hai faqat yar ke yarane se