sare mausam badal gae shayad

saare mausam badal ga.e shāyad

aur ham bhī sambhal ga.e shāyad

jhiil ko kar ke māhtāb supurd

aks pā kar bahal ga.e shāyad

ek Thahrāv aa gayā kaisā

zāviye hī badal ga.e shāyad

apnī lau meñ tapā ke ham ḳhud ko

mom ban kar pighal ga.e shāyad

kāñptī lau qarār paane lagī

jhoñke aa kar nikal ga.e shāyad

ham havā se bachā rahe the jinheñ

un charāġhoñ se jal ga.e shāyad

ab ke barsāt meñ bhī dil ḳhush hai

hijr ke ḳhauf Tal ga.e shāyad

saaf hone lage sabhī manzar

ashk āñkhoñ se Dhal ga.e shāyad

bārish-e-sañg jaise bārish-e-gul

saare patthar pighal ga.e shāyad

vo 'alīnā' badal gayā thā bahut

is liye ham sambhal ga.e shāyad

sare mausam badal gae shayad

aur hum bhi sambhal gae shayad

jhil ko kar ke mahtab supurd

aks pa kar bahal gae shayad

ek Thahraw aa gaya kaisa

zawiye hi badal gae shayad

apni lau mein tapa ke hum KHud ko

mom ban kar pighal gae shayad

kanpti lau qarar pane lagi

jhonke aa kar nikal gae shayad

hum hawa se bacha rahe the jinhen

un charaghon se jal gae shayad

ab ke barsat mein bhi dil KHush hai

hijr ke KHauf Tal gae shayad

saf hone lage sabhi manzar

ashk aankhon se Dhal gae shayad

barish-e-sang jaise barish-e-gul

sare patthar pighal gae shayad

wo 'alina' badal gaya tha bahut

is liye hum sambhal gae shayad