sare mausam hain mehrban se kuchh

saare mausam haiñ mehrbān se kuchh

roz utartā hai āsmān se kuchh

har 'ibārat savāl jaisī hai

lafz ġhā.eb haiñ darmiyān se kuchh

kis kī lau ne jalā diyā kis ko

raakh meñ haiñ abhī nishān se kuchh

kis se tafsīr-e-māh-o-sāl kareñ

din guzarte haiñ be-amān se kuchh

kyā ḳhabar ye kahāñ talak phaile

uTh rahā hai dhuāñ gumān se kuchh

kārvāñ kis kā manzileñ kis kī

kyā jhalaktā hai dāstān se kuchh

ek tasvīr raushnī le kar

saa.e nikle to haiñ makān se kuchh

is qadar e'tibār kar liije

rabt rakhtā huuñ ḳhāndān se kuchh

tum bhī us vaqt se Daro logo

jab nikal jaa.e is zabān se kuchh

sare mausam hain mehrban se kuchh

roz utarta hai aasman se kuchh

har 'ibarat sawal jaisi hai

lafz ghaeb hain darmiyan se kuchh

kis ki lau ne jala diya kis ko

rakh mein hain abhi nishan se kuchh

kis se tafsir-e-mah-o-sal karen

din guzarte hain be-aman se kuchh

kya KHabar ye kahan talak phaile

uTh raha hai dhuan guman se kuchh

karwan kis ka manzilen kis ki

kya jhalakta hai dastan se kuchh

ek taswir raushni le kar

sae nikle to hain makan se kuchh

is qadar e'tibar kar lije

rabt rakhta hun KHandan se kuchh

tum bhi us waqt se Daro logo

jab nikal jae is zaban se kuchh