sath hai bhi magar nahin dekha

saath hai bhī magar nahīñ dekhā

'umr-bhar ham-safar nahīñ dekhā

sar kisī sang-e-rah kī nazr huā

aap kā sang-e-dar nahīñ dekhā

maiñ ne tārīḳh meñ koī bhī shaḳhs

der tak taḳht par nahīñ dekhā

chāhe insān kī ho sūrat meñ

saañp ko mo'tabar nahīñ dekhā

merī āñkheñ udhar nahīñ uTThīñ

aur us ne idhar nahīñ dekhā

jab se suunī huī hai chhat apnī

chāñd bhī baam par nahīñ dekhā

haa.e duniyā ke baaġh meñ 'rāval'

zindagī kā shajar nahīñ dekhā

sath hai bhi magar nahin dekha

'umr-bhar ham-safar nahin dekha

sar kisi sang-e-rah ki nazr hua

aap ka sang-e-dar nahin dekha

main ne tariKH mein koi bhi shaKHs

der tak taKHt par nahin dekha

chahe insan ki ho surat mein

sanp ko mo'tabar nahin dekha

meri aankhen udhar nahin uTThin

aur us ne idhar nahin dekha

jab se suni hui hai chhat apni

chand bhi baam par nahin dekha

hae duniya ke bagh mein 'rawal'

zindagi ka shajar nahin dekha