saya sa ek KHayal ki pahnaiyon mein tha

saaya sā ik ḳhayāl kī pahnā.iyoñ meñ thā

sāthī koī to raat kī tanhā.iyoñ meñ thā

har zaḳhm mere jism kā merā gavāh hai

maiñ bhī sharīk apne tamāshā.iyoñ meñ thā

ġhairoñ kī tohmatoñ kā havāla bajā magar

merā bhī haath kuchh mirī rusvā.iyoñ meñ thā

TuuTe hue badan pe lakīroñ ke jaal the

qarnoñ kā aks umr kī parchhā.iyoñ meñ thā

girdāb-e-ġham se kaun kisī ko nikāltā

har shaḳhs ġharq apnī hī gahrā.iyoñ meñ thā

naġhmoñ kī lai se aag sī dil meñ utar ga.ī

sur ruḳhsatī ke soz kā shahnā.iyoñ meñ thā

'rāsiḳh' tamām gaañv ke sūkhe paḌe the khet

bārish kā zor shahr kī añgnā.iyoñ meñ thā

saya sa ek KHayal ki pahnaiyon mein tha

sathi koi to raat ki tanhaiyon mein tha

har zaKHm mere jism ka mera gawah hai

main bhi sharik apne tamashaiyon mein tha

ghairon ki tohmaton ka hawala baja magar

mera bhi hath kuchh meri ruswaiyon mein tha

TuTe hue badan pe lakiron ke jal the

qarnon ka aks umr ki parchhaiyon mein tha

girdab-e-gham se kaun kisi ko nikalta

har shaKHs gharq apni hi gahraiyon mein tha

naghmon ki lai se aag si dil mein utar gai

sur ruKHsati ke soz ka shahnaiyon mein tha

'rasiKH' tamam ganw ke sukhe paDe the khet

barish ka zor shahr ki angnaiyon mein tha