سب دکھی ہیں دنیا میں پھر بھی جو ہنسے ہوں گے

سب دکھی ہیں دنیا میں پھر بھی جو ہنسے ہوں گے

آہ روک لی ہوگی اشک پی گئے ہوں گے

رات کے ستارے جب ڈوبنے لگے ہوں گے

میری ہی طرح وہ بھی خود پہ ہنس دئے ہوں گے

کیا کسی تمنا کا حوصلہ کرے کوئی

دل میں جتنے ارماں تھے زخم بن چکے ہوں گے

اب میں کیا قدم رکھوں مصلحت کی دنیا میں

راہ بھی نئی ہوگی لوگ بھی نئے ہوں گے

آج میکدے ہی میں رات کاٹ دوں لیکن

اب تو وہ بھی دروازے بند ہو چکے ہوں گے

چل پڑا تھا میں شاداںؔ یہ خبر نہ تھی مجھ کو

غم کی ایک منزل کے اتنے راستے ہوں گے