sab ki nazron mein hai ghussa aur lab KHamosh hain

sab kī nazroñ meñ hai ġhussa aur lab ḳhāmosh haiñ

koī kuchh kahtā nahīñ hai sab ke sab ḳhāmosh haiñ

aur kuchh vo haiñ jo sahte haiñ magar kahte nahīñ

un ko hai malhūz bas pās-e-adab ḳhāmosh haiñ

ek chup sī lag ga.ī hai muskurāte tak nahīñ

sānahe logoñ pe guzre haiñ 'ajab ḳhāmosh haiñ

zinda lāshoñ kī tarah jiine lage haiñ log ab

saare jazbe ho chuke haiñ jāñ-balab ḳhāmosh haiñ

amn kā to ab zamāne meñ nishāñ tak bhī nahīñ

amn kī jin ko jahāñ meñ hai talab ḳhāmosh haiñ

kar rahe haiñ sab yahāñ par khul ke iz.hār-e-ḳhayāl

aap bhī kuchh boliye kyoñ be-sabab ḳhāmosh haiñ

hañste chehroñ par ye kaisī dard kī ik chhāp hai

gum haiñ hairat meñ sabhī sāz-e-tarab ḳhāmosh haiñ

sab ki nazron mein hai ghussa aur lab KHamosh hain

koi kuchh kahta nahin hai sab ke sab KHamosh hain

aur kuchh wo hain jo sahte hain magar kahte nahin

un ko hai malhuz bas pas-e-adab KHamosh hain

ek chup si lag gai hai muskuraate tak nahin

sanahe logon pe guzre hain 'ajab KHamosh hain

zinda lashon ki tarah jine lage hain log ab

sare jazbe ho chuke hain jaan-balab KHamosh hain

amn ka to ab zamane mein nishan tak bhi nahin

amn ki jin ko jahan mein hai talab KHamosh hain

kar rahe hain sab yahan par khul ke izhaar-e-KHayal

aap bhi kuchh boliye kyon be-sabab KHamosh hain

hanste chehron par ye kaisi dard ki ek chhap hai

gum hain hairat mein sabhi saz-e-tarab KHamosh hain