سب کی نظروں میں ہے غصہ اور لب خاموش ہیں

سب کی نظروں میں ہے غصہ اور لب خاموش ہیں

کوئی کچھ کہتا نہیں ہے سب کے سب خاموش ہیں

اور کچھ وہ ہیں جو سہتے ہیں مگر کہتے نہیں

ان کو ہے ملحوظ بس پاس ادب خاموش ہیں

ایک چپ سی لگ گئی ہے مسکراتے تک نہیں

سانحے لوگوں پہ گزرے ہیں عجب خاموش ہیں

زندہ لاشوں کی طرح جینے لگے ہیں لوگ اب

سارے جذبے ہو چکے ہیں جاں بلب خاموش ہیں

امن کا تو اب زمانے میں نشاں تک بھی نہیں

امن کی جن کو جہاں میں ہے طلب خاموش ہیں

کر رہے ہیں سب یہاں پر کھل کے اظہار خیال

آپ بھی کچھ بولئے کیوں بے سبب خاموش ہیں

ہنستے چہروں پر یہ کیسی درد کی اک چھاپ ہے

گم ہیں حیرت میں سبھی ساز طرب خاموش ہیں