sab ki qismat mein nahin sha’ir-e-dauran hona

sab kī qismat meñ nahīñ shā’ir-e-daurāñ honā

saḳht mushkil hai yahāñ shaad kā shādāñ honā

aap ne chāhā nahīñ dard kā darmāñ honā

kitnā āsān thā dushvār kā āsāñ honā

aap kā husn to ḳhud hosh uḌā detā hai

aap ko zeb nahīñ detā hai 'uryāñ honā

maiñ bhī sāhil kī tarah roz thapeḌe khā.ūñ

achchhā lagtā hai mujhe aap kā tūfāñ honā

kaash mujh ko bhī kabhī aap kī qurbat ho nasīb

aap kī bazm meñ chāhūñgā ġhazal-ḳhvāñ honā

ye to maiñ huuñ ki nahīñ baat baḌhī hai ab tak

chāhte roz haiñ vo dast-o-garebāñ honā

ye bure din bhī to 'nāshād' guzar jā.eñge

maiñ ne sīkhā hī nahīñ ġham se hirāsāñ honā

sab ki qismat mein nahin sha’ir-e-dauran hona

saKHt mushkil hai yahan shad ka shadan hona

aap ne chaha nahin dard ka darman hona

kitna aasan tha dushwar ka aasan hona

aap ka husn to KHud hosh uDa deta hai

aap ko zeb nahin deta hai 'uryan hona

main bhi sahil ki tarah roz thapeDe khaun

achchha lagta hai mujhe aap ka tufan hona

kash mujh ko bhi kabhi aap ki qurbat ho nasib

aap ki bazm mein chahunga ghazal-KHwan hona

ye to main hun ki nahin baat baDhi hai ab tak

chahte roz hain wo dast-o-gareban hona

ye bure din bhi to 'nashad' guzar jaenge

main ne sikha hi nahin gham se hirasan hona