sab mein hun phir kisi se sarokar bhi nahin

sab meñ huuñ phir kisī se sarokār bhī nahīñ

ġhāfil agar nahīñ huuñ to hoshyār bhī nahīñ

qīmat agar vo dete haiñ takrār bhī nahīñ

kuchh ham ko dil ke dene meñ inkār bhī nahīñ

nisbat hai jism o ruuh kī allāh-re ittihād

sub.ha agar nahīñ hai to zunnār bhī nahīñ

baiThā huuñ us kī yaad meñ bhūlā huuñ ġhair ko

zāhid agar nahīñ huuñ riyā-kār bhī nahīñ

jaa.eñ vo qatl-e-ġhair ko ham rashk se mareñ

aisī to apnī jaan se bezār bhī nahīñ

aanā ho aao varna ye kah do na ā.eñge

sun lo ye do hī bāteñ haiñ tūmār bhī nahīñ

saudā tamām ho gayā bāzār uTh gayā

vo dil bhī ab nahīñ vo ḳharīdār bhī nahīñ

tarz-e-jafā bhī bhuul ga.ī kyā vafā ke saath

dil-dār gar nahīñ ho dil-āzār bhī nahīñ

leñge hazār dar se palaT kar dar-e-murād

mun.im na deñ to kyā tirī sarkār bhī nahīñ

bhejeñge hasb-e-hāl unheñ go na likh sakeñ

kyā dāman aur dīda-e-ḳhūñ-bār bhī nahīñ

bulbul chaman ko dekh ḳhizāñ ke sitam ko dekh

gul kā to zikr kyā hai kahīñ ḳhaar bhī nahīñ

āzād haiñ sharāb ke aadī nahīñ 'habīb'

ahbāb gar pilā.eñ to inkār bhī nahīñ

sab mein hun phir kisi se sarokar bhi nahin

ghafil agar nahin hun to hoshyar bhi nahin

qimat agar wo dete hain takrar bhi nahin

kuchh hum ko dil ke dene mein inkar bhi nahin

nisbat hai jism o ruh ki allah-re ittihad

subha agar nahin hai to zunnar bhi nahin

baiTha hun us ki yaad mein bhula hun ghair ko

zahid agar nahin hun riya-kar bhi nahin

jaen wo qatl-e-ghair ko hum rashk se maren

aisi to apni jaan se bezar bhi nahin

aana ho aao warna ye kah do na aaenge

sun lo ye do hi baaten hain tumar bhi nahin

sauda tamam ho gaya bazar uTh gaya

wo dil bhi ab nahin wo KHaridar bhi nahin

tarz-e-jafa bhi bhul gai kya wafa ke sath

dil-dar gar nahin ho dil-azar bhi nahin

lenge hazar dar se palaT kar dar-e-murad

munim na den to kya teri sarkar bhi nahin

bhejenge hasb-e-haal unhen go na likh saken

kya daman aur dida-e-KHun-bar bhi nahin

bulbul chaman ko dekh KHizan ke sitam ko dekh

gul ka to zikr kya hai kahin KHar bhi nahin

aazad hain sharab ke aadi nahin 'habib'

ahbab gar pilaen to inkar bhi nahin