sabz shaKHon pe zamane ki nazar hoti hai

sabz shāḳhoñ pe zamāne kī nazar hotī hai

kis ko sūkhe hue pattoñ kī ḳhabar hotī hai

sadaf-e-chashm se bāhar jo na aane paa.e

buuñd ashkoñ kī vahī misl-e-guhar hotī hai

yaad ġhurbat meñ jab aatī hai vatan kī mujh ko

nā-gahāñ aañkh mirī ashkoñ se tar hotī hai

daf.atan dil kā har ik zaḳhm ubhar jaatā hai

jab bhī tasvīr tirī pesh-e-nazar hotī hai

shaam hote hī sulag jaate haiñ har ghar meñ charāġh

Duub jaate haiñ sitāre to sahar hotī hai

phuul to phuul haiñ patte nahīñ ugte jin meñ

aise peḌoñ se bhī umīd-e-samar hotī hai

aib-jūī meñ shab-o-roz guzāreñ jo 'asar'

apne kirdār pe kab un kī nazar hotī hai

sabz shaKHon pe zamane ki nazar hoti hai

kis ko sukhe hue patton ki KHabar hoti hai

sadaf-e-chashm se bahar jo na aane pae

bund ashkon ki wahi misl-e-guhar hoti hai

yaad ghurbat mein jab aati hai watan ki mujh ko

na-gahan aankh meri ashkon se tar hoti hai

dafatan dil ka har ek zaKHm ubhar jata hai

jab bhi taswir teri pesh-e-nazar hoti hai

sham hote hi sulag jate hain har ghar mein charagh

Dub jate hain sitare to sahar hoti hai

phul to phul hain patte nahin ugte jin mein

aise peDon se bhi umid-e-samar hoti hai

aib-jui mein shab-o-roz guzaren jo 'asar'

apne kirdar pe kab un ki nazar hoti hai